28. juni 2022

Skeide ny hovudtrenar for damelaget

Seint, men godt. Tysdag kveld vart det klart at Cecilie Skeide er ny trenar for a-laget for damer, for enkelheits skuld kalla damelaget. Ho tek over etter Bård Grimstad, som gav seg i fjor haust etter å ha leia laget i fleire år.

Skeide har ei lang fartstid som trenar for aldersbestemte lag i Hareid. Ho har også spelt aktivt for Hareid, Hødd og Hasundgot – og også spelt handball for to av desse klubbane.

Hareid IL Fotball seier seg svært godt nøgde med at Skeide tek på seg å bli hovudtrenar for Hareid i år.

Heile støtteapparatet er ikkje klart enno, men det er i alle fall klart at Silja Øvrelid blir ein av hjelpetrenarane.

Ho har tidlegare trena damelaget til Hasundgot, og alderbestemte lag både i Hareid og Hasundgot. Øvrelid har også spelt aktivt for Hødd og Hasundgot (for Hareid har ho berre spelt handball).

Damelaget er i år som i fjor påmeldt 4. divisjon. Stallen er akkurat no ikkje den aller største, men det er håp om at fleire spelarar kan knyte seg til laget no det er avklara kven som blir trenarar.

Fotballstyret seier seg godt nøgd med løysinga, og som nemnt kjem det også på plass andre brikkar i støtteapparatet etter kvart.

Damene trenar tysdagar, torsdagar og søndagar. Nye spelarar må gjerne ta kontakt.

Girri, girri!